НИТХ-ын Засаглал, эрх зүйн хороо өнөөдөр хуралдаж, цэргийн албыг биеэр дүйцүүлэн хаах иргэдийн тоог батлах болон бусад асуудлыг хэлэлцлээ. Мөн мега төслүүдийн хэрэгжилтэд хяналт тавих ажлын хэсэг байгуулах, хурлын бүтэц, бүрэлдэхүүнд өөрчлөлт оруулах асуудлыг танилцуулсан байна.

НЗДТГ-ын Цэргийн штабын дарга, хурандаа Г.Ялалт цэргийн дүйцүүлэх албаны сургалт, зохион байгуулалтын талаар мэдээлэл өглөө. Сургалт нь бэлтгэл болон тусгай үүргийн хоёр үе шаттайгаар онол, дадлагыг хослуулан явагдах юм.

Энэ онд нийслэлийн хэмжээнд нийт 78 иргэн цэргийн албыг биеэр дүйцүүлэн хаахаар төлөвлөжээ. Дүүргүүдээс ирүүлсэн саналд үндэслэн жил бүр Засгийн газрын тогтоолоор хүний тоог баталдаг байна.

Цэргийн дүйцүүлэх алба хаагчид дунджаар 180 хоног үүрэг гүйцэтгэж, гамшиг осол, хүмүүнлэгийн ажил, бүтээн байгуулалт болон батлан хамгаалах чиглэлийн ажилд оролцдог аж.