Амны эвгүй үнэрээс урьдчилан сэргийлэхэд ӨГЛӨӨНИЙ ЦАЙ хамгийн чухал!

    Хэдийгээр амны эвгүй үнэр нь эрүүл мэндэд муугаар нөлөөлөхгүй боловч хурцаар үнэртэх нь ойр орчмын хүмүүст эвгүй сэтгэгдэл үлдээх, нийгмийн харилцаанд оролцоход эвгүй байдалд оруулах, хувь хүн сэтгэл зүйн хувьд маш тавгүй байдалд орох зэрэг сөрөг талтай.

    Амнаасаа гарах эвгүй үнэрийн талаар мэддэггүй юмуу, Мэдсэн ч түүнийгээ тоодгүй  хүмүүс бий. Ихэнх хүн ходоод болон амьсгалын замын асуудал гэсэн ойлголттойгоор шинжилгээ хийлгэж, эмчид үзүүлдэг ч амны эвгүй үнэрийн шалтгааны 90 хувь нь амны хөндийн өвчлөлтэй холбоотой байдаг. Үүний дараа чих хамар хоолойн өвчлөл, хоол боловсруулах замын өвчнөөс шалтгаалдаг.

    Амны эвгүй үнэр үүсэх олон шалтгаантай. Гол нь өдөр бүр иддэг хоол болон хооллох зуршилтай салшгүй холбоотой. Бидний үндсэн хэрэглээний хүнс болох сонгино, сармис, өндөг, мах, сүү зэрэг нь амны эвгүй үнэр ихээр үүсгэдэг хоол юм. Тиймээс хооллосны дараа шүдний завсар болон хэлэн дээрх өнгөрийг сайтар цэвэрлэх нь чухал юм.

    Амны эвгүй үнэр үүсгэдэг 3 дэгдэмхий хүхрийн нэгдлүүд *Volatile sulfur compounds (VSC) байна. Үүнд:

    1. Өндөг ялзрахад үүсдэг үнэр - устөрөгчийн сульфид (hydrogen sulfide )

    2. Байцаа ялзрахад үүсдэг үнэр - метил меркаптан (methyl mercaptan )

    3. Сармис эсвэл сонгины өвөрмөц үнэрийг үүсгэдэг диметил сульфид (dimethyl sulfide )

    Дээрх нэгдлүүд нь уургийг задлах явцад тааламжгүй үнэртэй хий үүсгэдэг. Энэ нь амьсгалаар дамжин гадагшилж амны эвгүй үнэр гарна.  Хүн бүхний амнаас гарах ба онцгойлон бүрэн үгүй болгох эм, эмчилгээ байхгүй ч өдөр тутамдаа урьчилан сэргийлж анхаарах боломжтой.

    Амны эвгүй үнэрийг бүрэн арилгах боломжгүй ч тогтмол арчилах, өдөр тутмын амьдралын зөв хэвшилийг бий болгосноор үүнээс зайлсхийж болно.

    Тиймээс

    •Өдөр бүр хооллосны дараа шүдээ зөв сайн угаах

    •Хэлээ угаахыг мартахгүй байх

    • Ам зайлагч (өдөрт 2 удаа 30 секунд) болон усаар тогтмол зайлах

    •Мэргэжилийн эмчид 3-6 сар тутамд үзүүлж, цэвэрлэгээ хийлгэх

    •Өглөөний цай хоолоо заавал идэж занших!

    •Амны хөндийн ямар нэгэн өвчлөлгүй, дээрх зуршил хэвшмэл үед үнэр гардаг бол чих хамар хоолой, хоол боловсруулах замын асуудал байгаа эсэхээ нарийн мэргэжилийн эмчид хандан шинжилгээ, оношилгоо хийлгэх шаардлагатай.

    •Мөн спиртийн төрлийн ундаа нь амыг ихээр хуурайшуулж амнаас гарах эвгүй үнэрийг нэмэгдүүлнэ.

    •Өглөө амнаас эвгүй үнэр илүү хурц байдаг гэх хүн ялангуяа өглөөний цайг заавал уух хэрэгтэй. Яагаад гэвэл аман доторх болон ходоод гэдэснээс ялгарах дэгдэмхий хүхрийн нэгдлүүдийг 60-70 хувиар бууруулж өгдөг гэсэн судалгаа байдаг. (Journal of Periodontal Research 43(2):186-93)

    Тиймээс өглөөний цайгаа алгасаад зөвхөн шүдээ сайн угааж амны хөндийн эвгүй үнэрийг дарна гэсэн ойлголт нь хамгийн буруу ойлголт, зуршил юм.

Сэтгэгдлүүд : 0

Сэтгэгдэл оруулах

урлан