БНХАУ Бүгд найрамдах улсаа тунхагласны 70 жилийн ойгоо тохиолдуулан "далайн од" мэт өвөрмөц хэлбэртэй шинэ нисэх онгоцны буудлаа нээсэн билээ. Энэхүү нисэх буудлыг урд хөршийнхөн "Хятад мөрөөдлийн биелэл" гэцгээж байна. Ингээд шинэ нисэх буудлын тухай 10 баримтыг хүргэж байна.
1. Бээжингийн "Да Шин" нисэх буудал 4 нисэх зурвастай. 700 мянган м2 талбай бүхий терминалуудтайгаа нийлээд дэлхийн хамгийн том нисэх буудалд тооцогдоно.
2. Нисэх буудлын терминал нь "С" хэлбэрийн, нарны гэрэл чөлөөтэй нэвтрүүлэх зорилготой гурван хэсэг байгууламжаас бүрдэх ба ингэснээр цахилгаан гэрэлтүүлэг бага ашиглах юм.
3. Терминал дотор явган явах зайг хамгийн бага буюу 600 метр байхаар тооцоолсон. Нисэх буудалд ирэгсэд болон дамжин өнгөрөгсөд явганаар явахад дунджаар найман минут л зарцуулах юм.
4. Таван терминалтай ба терминал бүрийн төгсгөлд нэг цэцэрлэгт хүрээлэн байна. Шаазан цэцэрлэг, Хятад маягийн цэцэрлэг, Цайны цэцэрлэг, Торгоны цэцэрлэг, Хөдөө талыг санагдуулам цэцэрлэг гэх мэт өөрийн өвөрмөц онцлогтой.
5. Технологийн хамгийн сүүлийн үеийн шийдлүүд: а) Автомашиныг зогсоолд автоматаар тавих робот чиглүүлэгчтэй; b) царай таних бүртгэлийн системтэй; c) зорчигч нарт мэдээлэл өгөх робот "ажилтан"-тай; d) тээшээ хаана явж байгааг харж хянах боломж бүхий системтэй
6. "Галт шувууны нүд" хэмээх агаарын замын хяналтын цамхгаас 2,000 м2 талбайг 360˚ -т хянах ажиглах боломжтой бөгөөд хяналтын систем нь агаарт осол гарах магадлалыг автоматаар илрүүлнэ.
7. Бээжингийн шинэ нисэх буудал 2021 онд 45 сая, 2025 онд 72 сая, 2040 онд 100 сая зорчигч хүлээн авч бүрэн хүчин чадлаараа ажиллана гэх тооцоо бий.
8. Тус нисэх буудлын төслийг 2014 онд санаачилж, 2015 онд барилгын ажил эхлэн 2019 оны 9 сарын 25-нд ашиглалтад оруулсан байна.
9. Да Шин нисэх онгоцны буудлын архитектурыг "Zaha Hadid Architects" хэмээх шинэ үеийн архитектурын дүр төрхийг тодорхойлж байгаа модерн архитекторуудын групп хийц гүйцэтгэсэн байна. Группийг үүсгэн байгуулагч хатагтай Заха Мохаммед Хадид агсан нь дэлхийн шилдэг архитекторт олгодог Прицкерийн шагналыг хүртсэн хамгийн анхны эмэгтэй юм. Энэ группийн АНУ, Герман, Бельги, Англи, Азербайжан, Хятад зэрэг улсад барьсан нумарсан дизайнтай барилгууд нь орчин үеийн архитектурын гоо сайхныг шагшин гайхуулж байна.
10. Шинэ нисэх буудал Бээжингийн төв талбай Тианьанменаас 46 км зайтай.
урлан
Сэтгэгдлүүд : 0